Prezident İlham Əliyevin "Rossiya Seqodnya"nın Baş direktoru Dmitri Kiselyova geniş müsahibəsi zamanı söylədiyi fikirlər dövlətimizin geosiyasi və regional proseslərə dair mövqeyini bir daha bütün dünyaya nümayiş etdirdi.

Rusiya-Ukrayna müharibəsi fonunda NATO (Şimali Atlantika Müqaviləsi Təşkilatı) ilə şimal qonşumuz arasında gərginliyin təhlükəli məcraya yönəlməsini vurğulayan Prezident İlham Əliyev Azərbaycan və Rusiya arasındakı təmaslardan da danışıb.

Müttəfiqlik Bəyannaməsini ikitərəfli münasibətlərin inkişafında mühüm siyasi hadisə adlandıraraq həm Azərbaycan, həm də Rusiya üçün bunun vacibliyini bəyan edib. Dünyanı bürüyən müharibələr fonunda Azərbaycanın qonşu ölkələrlə münasibətə strateji önəm verdiyini diqqətə çatdırıb.

Gürcüstanda baş verənləri təhlil edən İlham Əliyev regional sabitliyin pozulmasının bütövlükdə bölgə üçün təhlükəli olduğunu bildirib. SİTAT: Əsrlərdir ki, xalqlarımız əmin-amanlıq şəraitində yaşayır. 

Gürcüstanda sabitliyin pozulması təkcə Gürcüstan yox, Azərbaycan üçün də zərərlidir. Öz tərəfimizdən çalışırıq ki, orada vəziyyət sabit olsun və Gürcüstan uğurla inkişaf etsin" - Sitatın sonu.

Prezident eyni zamanda Qərbin regionu nəzərətinə almaq niyyətindən də bəhs edib: Gürcüstanda Qərb maliyyəsi ilə minlərlə QHT fəaliyyət göstərir ki, çox sayda, on minlərlə, hətta daha çox adam buralarda çalışır və məvacib alırlar. 

Biz bilirik ki, bu, nə deməkdir. Bizim ölkəmizdə də qrantla qidalananların və qrant verənlərin özlərini ağa kimi apardıqları dövr var idi. Amma biz bunun qarşısını aldıq. Ona görə də istənilən bir qurumun, istər xarici olsun, istər daxili, verilənistənilən qrant qeydiyyatdan keçməlidir.

Fransa və xarici havadarlarından Ermənistana silah təhcizatını dayandırmağı tələb edən dövlət başçısı bunun, onların sürətlə silahlandırılmasının fəlakətli nəticələrə səbəb olacağı barədə xəbərdarlıq edir: "Onlar bizimlə silah yarışına tab gətirə bilməyəcək".

"Avropa İttifaqının nümayəndələrindən ibarət iki ay müddətində məhdud kontingent göndərildi. Sonra bu missiyanı da bizimlə razılaşdırmadan uzatdılar. Arqumentləri bu idi: Nəyə görə sizinlə razılaşdıraq ki. Bu missiya Ermənistanın ərazisindədir. Sonrası onların sayı 200 nəfərdən çox artırıldı. Bu missiya tədricən NATO-nun missiyasına çevrildi".

Prezident açıq şəkildə bəyan etdi ki, əgər doğrudan da sülh istəyirlərsə, Ermənistan öz konstitusiyasını dəyişməlidir. Çünki bu konstitusiyada Azərbaycana qarşı ərazi iddiaları yer alır. Daha bir tələb isə, kağız üzərində olan ATƏT-in Minsk Qrupunun ləğvidir. Bu məsələ konsensusla həll edildiyinə görə, formal da olsa Ermənistanın da razılığı olmadan bunu etmək mümkün deyil.

Prezident İlham Əliyevin Kiselyova müsahibəsində səsləndirdiyi fikirlər bir daha təsdiq edir ki:

- Beynəlxalq münasibətlər sisteminin gərginləşdiyi, müxtəlif coğrafiyalarda müharibələrin alovlandığı, birqütblü dünya naminə mübarizənin şiddətləndiyi bir şəraitdə ölkəmiz müstəqil xarici siyasi kursunu davam etdirəcək və qonşu dövlətlərlə münasibəti normal tənzimləyəcək. Eləcə də Rusiya ilə.

- Qərbin dünyanı və Cənubi Qafqazı qarışdırıb suyu bulandırmaq cəhdlərinə boyun əyməyəcək. Nəinki Azərbaycanda buna imkan verməyəcək, problemlə üzləşən qonşu ölkələrdə belə sabitliyin təminatına öz töhfəsini verəcək. Gürcüstanda olduğu kimi.

- Ermənistanı sürətli şəkildə silahlandıran qüvvələr sülh prosesinə mane olurlar və bu proses İrəvanın da əleyhinə yönəlib. Prezidentin mesajları bir daha təsdiq edir ki, ölkəmiz haqlı mövqeyindən qətiyyən geri çəkilməyəcək və istənilən bir təxribatın qarşısı qətiyyətlə və yerindəcə alınacaq.

- Müstəmləkəçilik və imperiya şakərindən qurtula bilməyən Fransanın, onun diktator rəhbəri Makron, eləcə də aqoniya vəziyyətində olan Co Baydenin və hər iki "dünya lideri"nin adminstrasiyasının təxribat və məkrli senarilərinin Azərbaycanı çəkindirmədiyi, əksinə, daha da da gücləndirdiyi bir daha təsdiqini tapır.

- O da təsdiqini tapır ki, ölkəmizə yönəlik hücumlar da Azərbaycanı haqq yolundan döndərməyəcək... Yəni, Cənab Prezident İlham Əliyevin bəyan etdiyi kimi, nəyi, nə vaxt, necə etmək lazımdırsa, məhz elə o cür da olacaq!

// Azər Niftiyev