Soçi səfəri Azərbaycanın növbəti siyasi və diplomatik uğurudur - TƏHLİL

Soçi səfəri Azərbaycanın növbəti siyasi və diplomatik uğurudur - TƏHLİL

Azərbaycan Prezidenti rusiyalı həmkarı ilə görüşdə birmənalı şəkildə bəyan etdi ki, Qarabağla bağlı müzakirə olunası məsələ yoxdur; Paşinyan isə növbəti dəfə pozuculuq mövqeyindən çıxış etdi; üçtərəfli görüşün yekunlarına dair birgə bəyanatda Qarabağla bağlı nüans yer almadı, "status” mövzusu da yoxdur!

 

Oktyabrın 31-də Rusiyanın Soçi şəhərində Rusiya Prezidenti Vladimir Putinin dəvəti əsasında Azərbaycan Prezidenti İlham Əliyev və Ermənistanın baş naziri Nikol Paşinyanın iştirakı ilə növbəti üçtərəfli görüş keçirilib.

"Azərbaycan hakimiyyəti Soçi görüşündə qətiyyətli mövqeyini bir daha ortaya qoydu.”


7NEWS.AZ xəbər verir ki, bu fikirləri Milli Məclisin deputatı İlham Məmmədov söyləyib: "Oktyabrın 31-də Azərbaycan Respublikasının Prezidenti İlham Əliyevin Rusiya Federasiyasının Prezidenti Vladimir Putin və Ermənistan Respublikasının baş naziri Nikol Paşinyan ilə görüşü olub. Görüş Rusiyanın Soçi şəhərində baş tutub. İki saatdan artıq davam edən danışıqlardan sonra liderlər tərəfindən birgə bəyanat qəbul edilib.

Prezidenti İlham Əliyev Ermənistanla sülh müqaviləsinin 5 prinsip üzərində qurulmasını təklif edib. Bu prinsiplər bir-birinin suverenliyinin və ərazi bütövlüyünün tanınması, ərazi iddialarının olmaması, bir-birinə qarşı güc və təhdidin tətbiq edilməməsi, sərhədlərin demarkasiyası və delimitasiyası, diplomatik münasibətlər və nəqliyyat kommunikasiyalarının açılması və yenilərinin inşa olunması kimi mühüm məsələri əhatə edir.

Xüsusilə qeyd etmək lazımdır ki, təzyiqlərə baxmayaraq Azərbaycan "Qarabağ münaqişəsi həll olunub, bu konteksdə danışacaq heç bir mövzu yoxdur" kimi prinsipal və qəti mövqeyini qorudu və Bəyanatda Qarabağla bağlı heç bir fikir yer almadı. Bu isə Qarabağ və orada yaşayan ermənilərlə bağlı məsələr barəsində veriləcək qərarların Azərbaycanın daxili işi olduğunu və bunu heç bir xarici ölkə ilə müzakirə etmək fikirimizin olmadığını bir daha təsdiq etdi.

Soçi görüşünün yekun nəticələri bu ilin sonuna qədər Azərbaycan və Ermənistan arasında sülh müqaviləsinin imzalanması istiqamətində müsbət təsir göstərəcək.”

"Möhtərəm Prezidentimiz İlham Əliyevin Soçi səfəri Azərbaycanın növbəti diplomatik uğurudur”


"Möhtərəm Prezidentimiz İlham Əliyevin Soçi şəhərinə işgüzar səfəri, orada keçirilən görüşlər və həmin görüşlərin nəticələri Azərbaycanın növbəti diplomatik uğurlarından biridir. Dövlət başçısı hər zaman olduğu kimi bu dəfə də ölkənin maraqlarını ən yüksək şəkildə müdafiə etdi və bütün gərəkən mesajları verdi” – 7NEWS.AZ xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.

"Təbii ki, dialoqların mövcudluğu və davamlılığı münasibətlərin aydınlaşdırılmasında çox mühüm rol oynayır. Biz zatən hər zaman həqiqətin və ədalətin yanında olmuşuq, öz addımlarımızı beynəlxalq hüquqa uyğun atmışıq, BMT-nin nizamnaməsinə, onun ana prinsiplərinə uyğunlaşdırmışıq.

Hazırda bölgədə sabitlik üçün tələb olunan əsas şərt Azərbaycanla Ermənistan arasında sülh müqaviləsinin imzalanmasıdır. Həmin müqavilə olsa, imzalansa sonrakı mərhələlərdə xüsusi bir kritikanın olmayacağı dəqiqdir.

 

Hesab edirəm ki, bir tək Rusiya deyil, bütün dünya dövlətləri həmin sülh müqaviləsinin bağlanmasını təşviq etməli, bu istiqamətdə əməli, faydalı və ədalətli addımlar atmalıdır”- deyə Partiya sədri fikirlərinə davam edib.

 

Cavid Məhərəmov

Material Azərbaycan Respublikasının Medianın İnkişafı Agentliyinin maliyyə dəstəyi ilə hazırlanmışdır. İstiqamətin kodu 6.3.9

 

 

Xəbər lenti